మద్రాస్ హైకోర్టులో విశాల్‌కు ఊరట

తమిళ నిర్మాతల మండలిలో రెండు వర్గాల మధ్య జరుగుతున్న వివాదంలో మండలి అధ్యక్షుడు విశాల్‌కు మద్రాస్ హైకోర్టులో ఊరట లభించింది. టి.నగర్‌లోని నిర్మాతల మండలి కార్యాలయానికి అసమ్మతి వర్గం సభ్యులు వేసిన తాళాన్ని, రెవెన్యూ అధికారులు వేసిన తాళాన్ని తీసివేయాలంటూ ఆదేశాలు ఇచ్చింది. నిర్మాతల మండలిలో రూ.7కోట్ల మేర అక్రమాలు జరిగాయంటూ ఓ వర్గం రెండ్రోజుల క్రితం ఆరోపణలు చేసింది. ఈ సందర్భంగానే టి.నగర్‌లో వున్న నిర్మాతల మండలి కార్యాలయం వద్ద అసమ్మతివర్గానికి చెందిన సినీనిర్మాతలు ఏఎల్‌ అళగప్పన్‌, సురేశ్‌ కామాక్షి, నటుడు ఎస్వీ శేఖర్‌ తదితరులు ధర్నా చేశారు. ఆ తర్వాత ఆఫీసుకు తాళం వేశారు. ఈ సంఘటనపై విశాల్‌ వర్గానికి చెందిన దర్శక నిర్మాత ప్రవీణ్‌కాంత్‌.. పాండి బజార్‌ పోలీసులకు ఫిర్యాదు చేశారు. గురువారం విశాల్ తన మద్దతుదారులతో కలిసి వెళ్లి కార్యాలయం తాళం బద్దలుకొట్టేందుకు ప్రయత్నించగా పోలీసులు అడ్డుకుని అరెస్ట్ చేశారు. అదే సమయంలో నిర్మాతల మధ్య నెలకొన్న తగాదాలను ప్రస్తావిస్తూ గిండి తహసీల్దార్ నిర్మాతల మండలి ఆఫీసుకు సీలు వేయడంపై విశాల్ హైకోర్టును ఆశ్రయించారు. దీనిపై విచారణ జరిపిన న్యాయమూర్తులు నిర్మాత మండలి కార్యాలయానికి వేసిన తాళం, సీల్‌ను తొలగించాలంటూ ఆదేశాలు జారీచేశారు.

ఈ వివాదంలో పోలీసులు ప్రవర్తించిన తీరుపై మద్రాస్ హైకోర్టు తీవ్ర ఆగ్రహం వ్యక్తం చేసింది. అసమ్మతి వర్గం నిర్మాతల వేసిన తాళాన్ని తీసేందుకు ప్రయత్నించి విశాల్‌ను ఎందుకు అరెస్ట్ చేశారంటూ నిలదీసింది. ఎన్ని వివాదాలున్నా మండలి అధ్యక్షుడి హోదాలో లోనికి వెళ్లే అధికారం విశాల్‌కు ఉంటాయని.. ఆయన్ని అడ్డుకోవడం సమంజసం కాదని పేర్కొంది. వివాదాలు జరిగినప్పుడు వాటిని సామరస్యంగా పరిష్కరించాలని.. పోలీసులు తలదూర్చి మరింత జఠిలం చేయకూడదని హైకోర్టు సూచించింది.

Loading…