Lakshmi’s NTR: ‘వెన్నుపోటు’ పాటతో భయపెడుతున్న వర్మ

ఎన్టీఆర్ జీవితంలో చోటుచేసుకున్న సంఘటనలతో ప్రముఖ దర్శకుడు రామ్‌గోపాల్‌ వర్మ తెరకెక్కిస్తున్న చిత్రం ‘లక్ష్మీస్ ఎన్టీఆర్’. ‘అసలు కథ’ అనేది ట్యాగ్ లైన్. ఈ చిత్రానికి సంబంధించి ‘వెన్నుపోటు’ పేరుతో ఓ పాటను వర్మ శుక్రవారం విడుదల చేశారు. ముఖ్యమంత్రిగా ఉన్న ఎన్టీఆర్‌కు వెన్నుపోటు పొడిచి పదవి నుంచి దించేశారంటూ.. ఎన్టీఆర్, చంద్రబాబు కలిసి ఉన్న ఆనాటి ఫోటోలను చూపిస్తూ బ్యాంగ్రౌండ్‌లో పాట ప్లే అవుతోంది. ఈ పాటకు సిరాశ్రీ సాహిత్యం అందించారు. కళ్యాణి మాలిక్ పాట పాడటంతో పాటు స్వరాలు కూడా అందించారు. ఈ పాటను చూస్తుంటే మరో వివాదానికి తెర తీసేలా ఉంది. ముఖ్యంగా చంద్రబాబు వర్గం ఈ పాటను వ్యతిరేకించే అవకాశం ఉంది.

‘దగా.. దగా.. మోసం.. నమ్మించి.. కమ్మించి వెన్నుపోటు పొడిచారు. వంచించి వంచించి వెన్నుపోటు పొడిచారు కుట్ర కుట్ర’ అంటూ పాట ప్రారంభమవుతోంది. ఈ సాంగ్ విడుదలకు సంబంధించి వర్మ ట్విట్టర్‌లో ప్రచారం భారీగా చేశారు. ఎన్టీఆర్ కుమారుడు బాలకృష్ణతో చెబుతున్నట్లు వర్మ చెప్పిన డైలాగులు ఈ సినిమాపై హైప్ క్రియేట్ చేస్తున్నాయి. ‘ఈ సినిమాలో నిజం ఉంది. నిజానికి సంబంధించిన సత్యం ఉంది. సత్యాన్ని తలదన్నే యదార్థం ఉంది. ఇంట్లోనూ వంటింట్లోనూ జరిగిన కుటుంబ కుట్రలు కావొచ్చు. సార్ అవేంటో మీకు, మీ కుటుంబానికి, మీ ఇంటల్లుడికి బాగా తెలుసు సార్. మీరు చెప్పరు కాబట్టే నేను చెప్పాల్సొస్తోంది’ అంటూ వర్మ ముగించారు.

Loading…