2.0 Piracy: 12వేల వెబ్‌సైట్లకు మద్రాస్ హైకోర్టు షాక్

కొత్త చిత్రాలను పైరసీ చేసి ఆన్‌లైన్లలో పెడుతున్న వెబ్‌సైట్లకు మద్రాస్ హైకోర్టు షాకిచ్చింది. దేశవ్యాప్తంగా 12వేలకు పైగా వెబ్‌సైట్లను బ్లాక్ చేయాల్సిందిగా న్యాయస్థానం 37 ఇంటర్నెట్ సర్వీస్ ప్రొవైడర్లను ఆదేశించింది. ఇందులో ‘తమిళ్ రాకర్స్’ పేరుతో ఆపరేట్ చేస్తున్న 2వేల వెబ్‌సైట్లు కూడా ఉన్నాయి. 2.0 నిర్మాణ సంస్థ దాఖలు చేసిన పిటిషన్‌పై విచారించిన జస్టిస్ ఎమ్.సుందర్ ధర్మాసనం బుధవారం ఈ మేరకు ఆదేశాలు జారీచేసింది.

సూపర్‌స్టార్ రజనీకాంత్, శంకర్ కాంబినేషన్లో తెరకెక్కిన భారీ బడ్జెట్ చిత్రం 2.0 గురువారం ప్రపంచవ్యాప్తంగా విడుదలైంది. ఈ చిత్రాన్ని పైరసీ చేసే అవకాశం ఉండటంతో నిర్మాణ సంస్థ మద్రాస్ హైకోర్టును ఆశ్రయించింది.

విచారణ సందర్భంగా లైకా ప్రొడక్షన్ న్యాయవాది విజయన్ సుబ్రమణియన్ హైకోర్టుకు 12,564 అక్రమ వెబ్‌సైట్ల లిస్ట్ సమర్పించారు. సినిమాలను పైరసీ చేయడంలో తమిళ్ రాకర్స్ పోటీ పడుతోందని, ఓ వెబ్‌సైట్‌ను బ్లాక్ చేసిన వెంటనే మరో యాఆర్‌ఎల్‌తో కొత్త వెబ్‌సైట్‌ను రూపొందించి చిత్రాలను ఆన్‌లైన్లో పెడుతున్నారని న్యాయస్థానం దృష్టికి తీసుకెళ్లారు. తమిళ్ రాకర్స్ నిర్వహిస్తున్న వెబ్‌సైట్స్‌తో పాటు ఇతర వెబ్‌సైట్ల జాబితాను హైకోర్టుకు సమర్పించిన సుబ్రమణియన్.. వాటన్నింటిపైనా చర్యలు తీసుకోవాలని కోరారు.

భారీ బడ్జెట్‌తో రూపొందించిన 2.0 చిత్రానికి సంబంధించి నిర్మాణ సంస్థ విడుదలకు ముందే థియేట్రికల్, మ్యూజిక్, డిజిటల్ రైట్స్, శాటిలైట్ రైట్స్ ద్వారా భారీ మొత్తానికి అమ్మిందని.. ఈ చిత్రం పైరసీకి గురైతే భారీగా నష్టపోయే అవకాశం ఉందని న్యాయస్థానానికి వివరించారు. కాపీరైట్ చట్టం ప్రకారం అనుమతి లేకుండా ఈ చిత్రానికి సంబంధించి ఎలాంటి పుటేజీని వాడుకోవడానికి వీల్లేదని హైకోర్టుకు తెలిపారు. పైరసీదారులు కొన్ని వెబ్‌సైట్లు, వెబ్ పేజీ లింకులు ద్వారా పైరసీ కాపీని ప్రపంచవ్యాప్తంగా అందుబాటులో ఉంచుతున్నారని.. దీనివల్ల నిర్మాతకు భారీ నష్టం వాటిల్లే ప్రమాదం తెలిపారు. ఇండియాలో 37 ఇంటర్నెట్ సర్వీస్ ప్రొవైడర్ల ద్వారా పైరసీ చిత్రాలను వీక్షిస్తున్నారని పిల్‌లో పేర్కొన్నారు. వాదనలు విన్న మద్రాస్ హైకోర్టు దేశవ్యాప్తంగా 12,564 వెబ్‌సైట్లను బ్లాక్ చేయాలని ఇంటర్నెట్ సర్వీస్ ప్రొవైడర్లను ఆదేశించింది.